Bibliaren Irakurketarako Hastapen Ikastaroa delako hau Madrileko La Casa de la Biblia taldeak osatua da. Liburuaren hasieran Atarikoa izenekoa dator. Sarrera baino gehiago edota, hobeto esan, Sarrera izateaz gain, 37 fitxa dakartza beste hainbat bileratan Biblia osoaren azaleko ikuspegia nola eman daitekeen azalduz. Liburuarekin berarekin nolabaiteko loturarik badu ere, aski independenteak dira biak. Liburua bera 52 kapituluk osatzen dituzten 15 zatitan banatzen da. Bibliaz eta Bibliaren munduaz argibide orokorrak emanez hasi, paulotar idatziez eta ebanjelioez eta I.B.ko gainerako idazkiez azalpenak ematen jarraitu eta I.Z.ari buruzko agerpenak emanez bukatzen da liburua. Bai I.B.ko liburuak, bai I.Z.ekoak gaur egun ohikoak diren sailetan banatzen ditu. Ikuspegi didaktiko handiz pentsatu eta adierazitako Bibliaren Sarrera argia eta eguneratua da, La Casa de la Bibliak bere lanetan ohiturik gauzkanez.
