Joxe Arregi Olaizola Azpeitian jaio zen 1952an. Parisen egin zuen teologian doktoretza, eta Deustuko Unibertsitatean irakasten du. Hemen, erlijio-gogoetarako aldizkariaren sortzailea eta zuzendaria izan da. «Erlijioen Jakinduria» Bildumaren (Deustu-Ibaizabal) koordinatzailea da. Argitaratutako liburuen artean: Hans Urs von Balthasar: dos propuestas de diálogo con las religiones (ESET, Gasteiz 1997); Nazareteko Jesus. Zer gizaki? Zer Jainko? (Deustuko Unibertsitatea, Bilbo 2000); Oinatzak bidean. Erlijioen historia (Deustuko Unibertsitatea, Bilbo 2004); Jainkorik bai ala ez? (Edorta Jimenezekin batera) (Elkar, 2007); Jainkoaz galdezka. 40 euskal idazleren erantzunak (Alderdania, Irun 2007); ¿Qué dices de Dios? Responden 40 escritores vascos de hoy (Deustuko Unibertsitatea, Bilbo 2010). Hemeretzigarren mendearen amaierako eta hogeigarren mendearen hasierako iragarpen ilustratuenak gezurtatuz, erlijioa aztergai interesgarri bilakatu da egungo filosofo eta soziologoentzat. Baina erlijio tradizionalak bost erronka nagusiren aurrez aurre dira gure kulturan: testu sakratuen irakurketa kritikoa eta mistikoa bideratzea, autoritatearen kudeaketa molde demokratikoetan gauzatzea, gizarte-aniztasunaren eskakizunak egiazki onartzea, erlijio-aniztasunaren ikuspegia sakon barneratzea, gizadiaren nahiz planeta osoaren egoera larria lehentasun gisa hartzea.
